Високите температури и уште повисоките планини не беа пречка за нашата авторка и нејзиниот сопатник, додека го поминуваа на велосипед Транс-Динарика – нова велосипедска рута што минува низ осум земји во дивите Динарски Алпи.

„Еј, пријателе!“ – ни довика велосипедист со австралиски акцент додека минуваше по нерамниот земјен пат, кој воедно е и главната улица на селото Тет, длабоко во албанските Динарски Алпи. Заедно со мојот пријател и сопатник, Дејв, не сретнавме ниту еден друг велосипедски патник цели четири дена.

Во јуни, заедно со Дејв, поминавме дел од новата 4.000 км долга велосипедска рута Транс-Динарика, која ги поврзува Албанија и останатите земји од Западниот Балкан преку планинскиот венец познат и како „Проклетије“. Рутата започнува од Словенија и минува низ диви и рурални подрачја на Хрватска, Босна и Херцеговина, Србија, Црна Гора, Албанија, Косово и Северна Македонија – преку јавни патишта со мешавина од чакал, земја и асфалт.
s
Токму поради оваа разноликост, Транс-Динарика нуди нешто за секого – без разлика на искуството и вештината на велосипедистите.

Балканот – суров, но незаборавен.

Брзо сфативме дека возењето по Транс-Динарика не е ниту налик на француските Алпи или италијанските Доломити, иако теренот – со варовнички карпи и стрмни падини – визуелно може да потсети. Во Франција и Италија, на секој серпентински свиок ќе сретнете велосипедисти, а продавници за поправка на велосипеди има во секое гратче. Во Албанија и Црна Гора, поминувавме цели денови без да видиме друга продавница, па дури и без обична продавничка за храна. Но, пејзажот беше неверојатен, патиштата – мирни, а регионот – во подем како нова авантуристичка туристичка дестинација.

„Целта е да ги претставиме Балканот и неговите луѓе во позитивно светло и да ги инспирираме луѓето да го доживеат овој регион од поинаков, одржлив агол,“ вели Јан Клавора од Словенија, еден од креаторите на рутата. „Рутата е економски важна, бидејќи носи приход во заедници што навистина го заслужуваат. Но таа е и културолошки значајна – затоа што поврзува региони што некогаш беа поделени од војна, а сега се спојуваат во едно сеопфатно искуство.“

Cycling the Western Balkans: A Wild, Yet Welcoming, Mountain Tour (www.nytimes.com)